Мен, Сағынбай Әсел Ғалымжанқызы, 1997 жылы дүниеге келдім. 2014 жылы Түркістан облысы Байдібек ауданындағы №1 мектеп-лицейді бітіріп, әл-Фараби атындағы Қазақ ұлттық университетіне «Экономика» мамандығына оқуға түстім. 2018 жылы бакалавриатты аяқтап, білімімді магистратурада жалғастырдым. Әл-Фараби атындағы ҚазҰУ мен Ресей халықтар достығы университетінің қосдипломды бағдарламасында оқып, ғылыми жауапкершілік пен жоғары оқу жетістіктерін көрсете отырып, магистр дәрежесін алдым. Кейін ғылыми жолымды жалғастырып, 2022 жылы ҚазҰУ-дың «Экономика» мамандығы бойынша докторантурасына қабылдандым. Докторантура кезеңінде ғылыми-зерттеу тақырыптарым өңірлік даму, табыс теңсіздігі, үй шаруашылықтарының әл-ауқаты, кедейлік деңгейі және шағын және орта кәсіпкерліктің әлеуметтік тұрақтылыққа ықпалы бағыттарына арналды. Оқу барысында ККСОН тізіміндегі 4 мақала, халықаралық конференцияларда 5 баяндамам және Scopus базасында 1 жарияланымым жарық көрді. Қазіргі уақытта әл-Фараби атындағы ҚазҰУ-дың Экономика кафедрасында оқытушы болып қызмет атқарамын. Сонымен қатар, ЖТН AP23489032 ғылыми жобасы аясындағы зерттеулерге қатысып, аналитикалық ойлау, деректермен жұмыс істеу және зерттеу жүргізу дағдыларымды жетілдіріп келемін. Үш тілде сабақ беремін және IELTS сертификатына иемін. Кәсіби қызметімде жауапкершілік, жүйелілік, ғылыми дәлдік және студенттермен нәтижелі жұмыс жүргізу қабілеті басты ұстанымдарымның бірі. Болашақта ұлттық экономиканың өзекті мәселелерін зерттеуді жалғастырып, ғылыми әлеуетті дамытуға үлес қосуды мақсат етемін.